NO DANIWANKA

Pangbukat a post-ko iti daytoy bukod a blog. Diak maipasimudaag ti kinalawag ti kalakagumko a mangaramat iti internet ken ti panagpipinnadigo kadagiti idea ken kapanunotan, agraman ngarud ti gapuanan ti imahinasion–a maiparbeng a daniw, daniw iti adu a klase ken estilona.

Idi damo nga agsurattay kadagiti gagayyem, daniw dagiti imputulod! Ania ketdin ta imbes a surat, tay deretso a surat a maibuson, daniw ti ilanad. Masdaaw ti umawat.  Inggana ita diak malipatan nga nareggetak iti kastoy a kita ti komunikasion: ti surat a daniw.

Iti panawen ti texting wenno panagaramat ti e-mail, iti FB man wenno iti bukod a website, daniw ti i-post. Mabalin? Mabalin la ketdi, apay ketdin a saan.

Maaramat metten dagiti retrato wenno video a pangbayabay wenno mangted iti rangrang dagiti nalidem a letra ti daniw, numan pay nagpintas koma a basaen lattan.

Pudno, adda bukodna a bileg dagiti balikas, agsipud pay naurnos ti lengguahe ti daniw iti pangngarig (metafora), dramatiko a panag-estoria, alegorika, tono a maiduma iti prosa, representation babaen iti kabarbaro nga imahe a binukel ken inlanad mismo ti mannaniw ken amin pay a baro a panangilaga segun ti annuroten iti panagsurat kadagiti daniw.

No binsabinsaen, manipud iti Poetics ni Aristotle ingganat poesia dagiti moderno a mannaniw a kas kada Robert Frost, T. S. Eliot, Wallace Stevens ken William Carlos Williams, agraman da Pablo Neruda ken dadduma pay a nangababak iti Nobel, napatak a ti daniw ket maysa a forma ti arte nga addaan bukod a linteg ken annuroted kas iti panagpinta, eskultora, sala ken musika.

Ngem, ala, atiddog wenno atiddag metten daytoy a pangbukat iti nawadwad ken nabaknang a daga ti literatura ken poesia.

Iti ababa a pannao:

[] Silulukat daytoy a benneg para kadagiti amin a dumadaniw.

[] Ma-edit dagiti sumrek tapnon maikompluntar kadagiti alagaden ti panagsurat iti daniw : (1) bukod nga obra ti mannaniw, (2) nasekken ti metaforika ken makaguyugoy iti emosion ken panunot, ken (3) umdas ti kaatiddogna iti tema a nangbukel iti daniw.

[] Mausar ti ortograpia ti Iloko a gagangayen nga ususaren.

{] Optional ti English poem

Umayyo iyeg ngaruden dagiti daniwyo.